Аўтатрактарны факультэт - адзін з прэстыжных і найбуйнейшых факультэтаў Беларускага нацыянальнага тэхнічнага ўніверсітэта, цэнтр падрыхтоўкі спецыялістаў для аўтатрактарнай прамысловасці і транспартнай галіны Рэспублікі Беларусь, навуковых работнікаў па многіх напрамках народнай гаспадаркі, выкладчыцкіх кадраў.
За 70 гадоў свайго існавання факультэт увесь час развіваецца. У першыя гады ён рыхтаваў інжынераў па чатырох спецыяльнасцях: аўтамабільным транспарце, аўтабудаванні, трактарабудаванні і механізацыі сельскагаспадарчай вытворчасці.
Цяпер факультэт рыхтуе інжынераў і эканамістаў па 15 спецыяльнасцях дзённай формы атрымання адукацыі і 8 - завочнай; навучаецца на факультэце больш за 2000 студэнтаў па дзённай, больш за 1800 – па завочнай формах атрымання адукацыі.
На АТФ працуе каля 300 супрацоўнікаў, педагагічны калектыў прадстаўляе амаль 170 чалавек. З іх заняткі вядуць больш за 20 дактароў навук, прафесараў і больш за 80 кандыдатаў навук, дацэнтаў. Яны не толькі рыхтуюць спецыялістаў аўтатрактарнага профіля, але і вядуць навуковыя даследаванні, цесна звязаныя з патрэбамі далейшага тэхнічнага прагрэсу гэтай галіны.
На прамысловых, аўтатранспартных прадпрыемствах, у канструктарскіх бюро, навучальных установах не толькі Беларусі, але і Расіі, а таксама больш як у 60 іншых замежных краінах працуюць тысячы выпускнікоў аўтатрактарнага факультэта. Яны ствараюць новыя аўтамабілі, спецыяльныя машыны, абсталяванне, абслугоўваюць іх, кіруюць вытворчасцю, арганізуюць дарожны рух. І ўсюды паказваюць глыбокія веды сваёй справы, з'яўляюцца прыкладам у працы і паводзінах, навучаюць і выхоўваюць тэхнічныя кадры.
